ಅಡಿ ಟಿಪ್ಪಣಿ
ಕೊಳ : ರಸ್ತೆ ಬದಿ ಕೂತ ಮುದಿ
ಸ್ವಾತಂತ್ರ್ಯ ಯೋಧನ ಕಣ್ಣು
ಮರ : ಬಿಟ್ಟಲ್ಲೇ ಲಡ್ದಾದ ಬೋಳು
ಬಾವುಟದ ಕೋಲು
ಚಂದ್ರ : ಇರುವೆಗಳ ಮಧ್ಯೆ ಚಲಿಸುತಿರುವ
ಸ್ತಬ್ಧ ಚೂರು ರೊಟ್ಟಿ
ಸೂರ್ಯ : ಬಟ್ಟೆ ತೊಟ್ಟಿಲಲ್ಲಿ ಹೊಳೆವ
ಕೈಕೂಸಿನ ನೆತ್ತಿ
ನದಿ : ಮನೆ ಬಿಟ್ಟೋಡಿದ ಪೋರಿಯ
ಏದುಸಿರಿನ ಜಾಡು
ಕಾಮನಬಿಲ್ಲು : ಕಾಮಾಟಿಪುರದಲಿ ಒಡೆವ
ಬಳೆಗಳ ಚೂರು
ಹಗಲು : ಬೇಕಾರ್ ಪೋರನ ಎದುರು
ಬಿದ್ದ ರದ್ದಿ ಪತ್ರಿಕೆ
ಹಕ್ಕಿ : ಸಂತ್ರಸ್ತರಿಗೆಂದೇ ಬಾಲ್ಕನಿಯಿಂದ
ಎಸೆದ ಹಳೇ ಹರಕು ಬಟ್ಟೆ
ರಾತ್ರಿ : ಹಳೆ ಗೆಳೆಯನ ಅರಸುತ್ತಾ
ಅಲೆದು ಬಂದ ಬವಳಿ
ಇಂಚರ : ಶಿವಕಾಶಿ ಪಟಾಕಿಯಲಿ ಸುತ್ತಿದ
ಎಳೆ ಕಂಠಗಳ ಸುರುಳಿ
ಕವಿತೆ : ಸ್ವಂತ ವಿಳಾಸ ಇಲ್ಲದವ
ಬರೆಯದ ಪತ್ರದ ಸಾಲು
ಬೆಳಗು : ಮೂಕನ ಅರೆ ಎಚ್ಚರದಲಿ
ಕೇಳಿ ಬಂದ ಹಾಡು
- ಜಯಂತ ಕಾಯ್ಕಿಣಿ
' ಒಂದು ಜಿಲೇಬಿ '
ಕಾಮೆಂಟ್‌ಗಳಿಲ್ಲ:
ಕಾಮೆಂಟ್‌ ಪೋಸ್ಟ್‌ ಮಾಡಿ