ಚೆನ್ನ

೧

ನನ್ನ ನಿನ್ನ ಬೆನ್ನ ಬಳಿ ವಿಶಾಲವೃಕ್ಷ ಬೆಳೆದಿದೆ

ಮುಗಿಲ ತುಂಬಿ ಉಳಿದಿದೆ.

ಗಾಳಿಯಂತೆ ಸುಳಿದಿದೆ

ನನ್ನ ನಿನ್ನ ನೋಟ ಮಾತ್ರ ಎರಡು ದಿಕ್ಕಿಗೆಳೆದಿದೆ.

ಬೇರೆ ಹಾದಿ ತುಳಿದಿದೆ.

೨

ಕೈಗೆ ಕೈಯು ಹತ್ತಿರಿದ್ದು, ಮೈಗೆ ಮೈಯು ಹತ್ತದು

ಕಣ್ಣು ಕಣ್ಗೆ ಮುತ್ತದು

ಎವೆಗಳನ್ನು ಎತ್ತದು.

ಮನದ ಮಾತು ಮಾತ್ರ, ಮನದವರೆಗೆ ಬರದೆ ಬತ್ತದು

ಸುಳ್ಳು ಹಾದಿ ಸುತ್ತದು.

೩

ಕುಳಿತ ಹಾಗೆ ದೇಹವನ್ನು ಬೀಳಲುಗಳು ಬಿಗಿದಿವೆ.

ಮೈಯ ಕೆಲಸ ಮುಗಿದಿವೆ.

ಚಿತ್ತದೂಟೆ ನೆಗೆದಿವೆ ;

ಜೀವದಾಳದಲ್ಲಿ ಮಡಗಿದಂಥ ಮುತ್ತನೊಗೆದಿವೆ.

ಮೇಲು ಹಾದಿ ಬೆಳಗಿವೆ.

೪

ಯಾವ ಜನುಮದೊಂದು ರಾಗ ಈ ವಿರಾಗವಾಗಿದೆ?

ಬಾಳಗೊನೆಯು ಬಾಗಿದೆ

ಕಾಯಿ ಪಾಡು ಮಾಗಿದೆ.

ಜೀವದೋಟ ನೋಟವಾಗಿ ಮುಂದೆ ಮುಂದೆ ಸಾಗಿದೆ

ಎಲ್ಲೊ ಲೀನವಾಗಿದೆ.

                                                    - ದ.ರಾ. ಬೇಂದ್ರೆ

                                                      ' ನಾದಲೀಲೆ '