ಎಂಥಾ ಹದವಿತ್ತೇ !
ಎಂಥಾ ಹದವಿತ್ತೇ! ಹರಯಕೆ
ಏನೋ ಮುದವಿತ್ತೇ
ಅಟ್ಟೀ ಹಿಡಿದು
ಮುಟ್ಟೀ ತಡೆದು
ಗುಟ್ಟೂ ಸವಿಯಿತ್ತೇ - ಗೆಳತಿ
ಅಮ್ಮನು ಬಡಿಸಿದ ಊಟದ ಸವಿಯು
ಘಮ್ಮನೆ ಕಾಡಿತ್ತೇ
ಅಪ್ಪನು ಬೆಳೆಸಿದ ಮಲ್ಲಿಗೆ ಚಪ್ಪರ
ಹೂವನು ಚೆಲ್ಲಿತ್ತೇ
ಅಣ್ಣನ ಕೀಟಲೆ ತಮ್ಮನ ಕಾಟಕೆ
ಬಣ್ಣದ ಬೆಳಕಿತ್ತೇ!
ನಲ್ಲನ ಕಣ್ಣಿನ ಸನ್ನೆಗೆ ಕವಿತೆಯ
ಸುಳ್ಳಿನ ಸೊಬಗಿತ್ತೇ
ಮೆಲ್ಲನೆ ಉಸುರಿದ ಸೊಲ್ಲಿನ ರುಚಿಯು
ಬೆಲ್ಲವ ಮೀರಿತ್ತೇ
ಸುಳ್ಳೇ ನಿರಿಗೆಯ
ಚಿಮ್ಮುವ ನಡಿಗೆಗೆ
ಬಳ್ಳಿಯ ಬೆಡಗಿತ್ತೇ
ಎಂಥಾ ಹದವಿತ್ತೇ ಗೆಳತಿ
ಎಂಥಾ ಮುದವಿತ್ತೇ!
ಕಾಣದ ಕೈಯಿ ಎಲ್ಲಾ ಕದ್ದು
ಉಳಿಯಿತು ನೆನಪಷ್ಟೇ!
- ಡಾll ಎನ್. ಎಸ್. ಲಕ್ಷ್ಮೀ ನಾರಾಯಣ ಭಟ್ಟ
ಕಾಮೆಂಟ್‌ಗಳಿಲ್ಲ:
ಕಾಮೆಂಟ್‌ ಪೋಸ್ಟ್‌ ಮಾಡಿ